اسماء حركية

صباح الاوهام ..

احنا شعب عنده حيله جميله قوى وسهله وبسيطه قوى لتجميل اى مشكله بيعانى منها ..هيا مش حيله للتجميل هيا حيله للاخفاء ..(تعويزه ) كلمه سحريه بنقولها قدام مشاكلنا ..تقوم مشاكلنا تختفى تماما ومعدناش نحس بيها خالص .

يعنى لو عندنا مشكله زى قهر المرأه واستعبادها ..والتجاره المشروعه فيها والاسائه ليها والعنف ضدها ..دى مشكله بتكون عامله فى اى مجتمع تانى زى السوس ..بس احنا اخترعنا ليها اسم حركى خلى المشكله تختفى تماما ويا دار ما دخلك شر ...بقى كل التخلف الى فات ده اسمه ( تقاليدنا الاصيله ) اول ما سمناها تقاليدنا الاصيلة ...معدتشى مشكله خالص . وبقينا متكيفين تماما ..ومرتاحين تماما وكل القهر ده بيحصل حوالينا .

لو عندنا شله ملهاش اى وظيفه ..ولا ليها اى هدف فى الحياه ..غير انها تلحق تلم قرشين قبل الظروف الحالية ما تتغير ..( ايا كانت الظروف الحاليه ) الشله دى اسمها العلمى ...والصح ..( جمعية المنتفعين من الظروف الحالية للبلد ..) بس احنا عشان مانقومشى ونام ونعيش حياتنا وحاسين ان فى قطيع من مصاصين الدماء بيمصو دمنا ..ليل نهار ...اطلقنا على الجمعيه دى اسم( حزب) .

لو عندك مشروع فاشل ...يبقى اسمه فى مصر ..( مشروع متعسر )
ولو عندك جار اهبل ...ومجنون ولا متخلف عقليا ...يبقى اسمه راجل طيب ..مع نفسه ...اوراجل بتاع ربنا .

احنا نفس الشعب الى سمى الهزيمه ..( نكسه ) والى سمى الانقلابات العسكرية ( ثوره ) والى سمى الرأسمالية الوطنيه ( اقطاع )
وراسمالية الدوله ( اشتراكية ) ..واحنا برضه الى سامينا المجارى ...والكبارى ..( مشروعات قوميه )

واحنا الى سمينا الموت ..( استقرار ) ...وتبلد المشاعر ...وعجز الاستجابه ..( تريث وحكمة ) ..!!

ديما عندنا اسم بديل لكل حاجه مش عجبانا اسم مخفف ومتزوق ...بديل للاسم القبيح الى منغص علينا عشيتنا ...بس المضمون هو هو متغيرشى بتغيير الاسم يعنى ولا حاجه . المضمون لسه قبيح وبيزيد قبحه كل يوم . !!

انا شايف ان الاسماء الحركيه وتعويزه الاخفاء السحريه دى كلها نابعه من ان عندنا حالت انكار لمشاكلنا .

يعنى لما تحصل لينا مصيبه ...كل الى علينا نعمله اننا نخترع ليها اسم جديد ..اسم حركى ...بخ ...فركش خلاص ...المصيبه تختفى .

حتى لو مش بيحصلنا مشاكل ولا مصايب ..احنا بنتصور اننا كمصريين مش ممكن يحصلنا الى بيحصل فى اماكن كتير تانيه فى العالم .

لو انت ماشى فى اى بلد فى الدنيا وسمعت صوت رصاص .... الناس كلها هتنبطح على الارض ...عندنا فى مصر لا الناس كلها هتبص عايزه تتفرج تشوف مين الى بيضرب نار ..!!

عندنا احساس غرييييييييييييييب جدا بالامان والحصانه .

لو طلع حد يتكلم عن الرعب النووى ..هيتحول خلال اسبوع لاراجوز ...طوب الارض يتريق عليه ...لانه بيتكلم عن حاجه مستحيله ( مستحيل ننضرب بقوه نوويه ...مستحيل يبقى عندنا سلاح نووى ..)

لو طلع حد اتكلم عن التلوث ..والاحتباس الحرارى وتغير المناخ ..وتاكل الشواطئ ...يبقى بيدن فى مالطا .

محدش سامع ...ولا حد فاهم ...ولا اصلا حد عايز يسمع ولا يفهم .

على فكره احنا كده مش بس بننكر وجود المشاكل حوالينا ...لا احنا بننكر اننا موجودين واننا جزء من العالم ...والمصيبه ان الانكار مش هيغير حاجه .

عندنا فى مصر ناس بيوصل بيهم حالة الانكار دى انها لما تخلف بنت ...تسميها باسم ولد ..لانها فى الاصل كانت عايزه ولد مش بنت ...تلاقى بنت اسمها حنفى ...وليد ...سعد ....ولو حالت الانكار خفيفه شويه ...تلاقى البنت اسمها ...سعيده ...حنفه ...وليده .

نفسى اغمض وافتح الاقى كل حاجه فى مصر متسميه باسمها ...نفسى اصحى فى يوم الاقى الاسماء واليفط والعناوين والاعلانات والبيانات ...خاليه من حالت الانكار ...وخاليه من حالت خداع الذات ...وخاليه من الكلمات السحرية والتعويذات الى بتخفى العيوب من غير ما تعالجها
كانت معاكم منال الى اسمها الحركى بردوا منال
مستنية ارائكم